Volleyball.is

Blakfólk lét hendur standa fram úr ermum um helgina. 64 leikir fóru fram í deildakeppni BLÍ.

Þetta sýnir vel hversu mikið blakhreyfingin hefur stækkað á undanförnum árum. 

Fjölmargir leikir fóru fram í MIKASA deildunum auk þess sem leikið var í 2. deildinni og þeirri þriðju. Þrátt fyrir slæmt veður og þæfingsfærð fóru allir leikirnir fram og öll lið skiluðu sér á leiksstað. Skellurnar frá Ísafirði létu sig t.d.  ekki muna um að mæta á Hvolsvöll en þar var leikin  túrnering í 3. deildinni. Þær kalla ekki allt ömmu sína fyrir Vestan! 

Í MIKASA deild kvenna var leikin heil umferð. Þróttur Nes gerði sér ferð í höfuðborgina og mætti nöfnum sínum úr Reykjavík á föstudagskvöldið. Norðfirðingar unnu leikinn 3 - 1 en virkuðu ekki sannfærandi. Lið Reykjavíkur Þróttara var hálf andlaust og náði ekki að setja alvöru pressu á Norðfirðingana. Allt sjálftraust vantar í þær röndóttu en þær geta leikið mikið betur þær sýndu þarna. Sanngjarn sigur hjá Þrótti Nes.

Á laugardaginn léku Norðfirðingar aftur og nú við meistaralið HK. HK vann leikinn 3 - 0 en lifðu nokkuð hættulega um tíma. Lið HK hefur mikla breidd og vandséð hvaða lið getur ógnað þeim í úrslitakeppninni - nema þá helst KA. Norðfirðingar léku á Erlu Ránar Eiríksdóttur sem er meidd í baki og óvíst hvort hún leikur meira með liðinu á þessu tímabili. Það munar um minna.

Karlalið HK tók á móti Stjörnumönnum á laugardag og sem fyrr léku liðin 5 hrinur. HK hafði á endanum sigur en leikurinn gat farið á hvorn veginn sem var. HK hefur nú lokið leikjum sínum í deildinni og hefur 16 stig líkt og KA. KA á hinsvegar 2 leiki til góða og dugir sigur í öðrum þeirra til að verða Deildarmeistarar. Lið Stjörnunnar endar í þriðja sæti þó liðið eigi einn leik eftir gegn KA. Leikur Stjörnumanna hefur farið batnandi í vetur og þeir gætu bitið frá sér í úrslitakeppninni.

Ýmir tók á móti Stjörnunni á laugardag í MIKASA deild kvenna. Þessi leikur fór einnig í 5 hrinur og lauk með sigri Stjörnustúlkna sem þarmeð unnu sinn annan sigur í vetur. Með sigrinum lyftu þær sér úr botnsætinu sem þær hafa vermt í allan vetur. Sigurinn kemur á góðum tíma fyrir Stjörnustúlkur og mun eflaust auka hjá þeim sjálfstraustið fyrir úrslitakeppnina/fallslaginn.

Á sunnudaginn tók svo KA á móti Fylki í MIKASA deild kvenna. Fylkisstúlkur sáu aldrei til sólar í þeim leik sem lauk með öruggum sigri KA  3 - 0. Með sigrinum lyfti KA sér upp í annað sæti deildarinnar. 

Á sunnudaginn fór fram framhaldsskólamót sem er liður í íþróttavakningu framhaldsskólanna. 8 lið mættu til leiks sem er heldur færra en vonir stóðu til. Úrslitakeppnin fer svo fram 19. mars. Lið MK vann riðilinn sem leikinn var í Digranesi í Kópavogi en lið VMA fór með sigur af hólmi fyrir Norðan en leikið var á Laugum. 

Þá fór fram grunnskólamót á Akureyri en nemendur í 7. og 8. bekk grunnskóla bæjarins tóku þátt. Þetta mun vera í fyrsta skipti sem þessi keppni er haldin og er þetta lofsvert framtak hjá Akureyringum. Fleiri mættu taka sér þetta til fyrirmyndar.