mánudagur 06.apríl 2009 - Stefán Jóhannesson - Lestrar 114 -
Athugasemdir (0) Senda á Facebook
Hávörn Trentino var öflug
Ítalska liðið Trentino Volley tryggði sér Evrópumeistartitilinn með 3-1 sigri á gríska liðinu Iraklis Thessaloniki. Leikið var í Prag
í Tékklandi.
Liðin sýndu sparihliðarnar í leiknum en Ítalirnir voru einfaldlega sterkari þegar á reyndi. Leikurinn var í járnum framan af og virtist geta
þróast í hvora áttina sem var. Liðin unnu hvort sína hrinu og í þriðju hrinunni fylgdust þau að í 12-12. Þá skildu
leiðir og Trentino kláraði leikinn með stæl - með 2 ásum. Með liði Thessaloniki leikur sænska stjórstjarnan Marcus Nilsson.
Leikurinn um bronsið var einnig spennandi en Rússarnir í Odinstovo náðu að knýja fram sigur á ítalska liðinu Macerata í 5 hrinu leik.
Umgjörð leikjanna var frábær hjá Tékkunum og var O2 höllin í Prag full á öllum leikjunum. Það var svo sárabót fyrir
heimamenn að landi þeirra Martin Lebl, leikmaður Macerata var valinn besti sóknarleikmaður keppninnar.
Það voru því ítölsk lið sem sigruðu keppnina bæði í karla- og kvennaflokki í ár. Auk þess áttu
Ítalir 2 lið af 4 sem kepptu til úrslita hjá báðum kynjum. Þetta sýnir svo ekki verður um villst að bestu deildir Evrópu eru á
Ítalíu.
