Volleyball.is

Fréttir

Fleira þarf í dansinn en fagra leggi

sunnudagur 23.ágúst 2009 - Ritstjórn Volleyball.is - Lestrar 451 - Athugasemdir (13)

Frá Heimsmeistaramótinu í Stavanger

Mikið vatn hefur runnið til sjávar frá því að menn byrjuðu að kynna strandablak á Íslandi og frá því að fyrstu mótin fóru af stað á 9. áratugnum. Strandblak er í dag vinsæl Ólympíugrein en greinin hefur líka vaxið á alþjóðavísu þar sem mörg mót eru haldin og háar fjárhæðir í boði fyrir sigurvegarana. Nú er svo komið að keppt er í strandblaki nánast allt árið en aðaltíminn í Evrópu er frá miðjum maí til loka september.

Beinar sjónvarpsútsendingar og aukin markaðssetning leiksins hefur einnig skapað meiri áhuga á Íslandi og er það hið besta mál, enda eru miklir möguleikar á því að framtíðarafreksíþróttamenn komi frá Íslandi sé litið til sögu og reynslu Norðmanna.

Í Noregi eru nærri því tvö þúsund strandblakvellir og hefur greinin náð að skjóta sterkum rótum í þessu norðlæga landi sem býr við svipað veðurfar og Ísland. Blaksamband Íslands fer venju samkvæmt með æðsta boðvald í íþróttinni og því ber að halda utan um skipulagt mótahald í greininni, setja félögum og íþróttamönnum helstu umgengisreglur greinarinnar, auk þess að sjá til þess að keppnis- og agareglur séu í samræmi við alþjóðareglur þar sem að Íslandsmeistarar greinarinnar öðlast keppnisrétt í evrópu- og heimsmeistaramótum framtíðarinnar þar sem að há peningaverðlaun eru í kortunum ef vel gengur. Það er því brýnt að lög og reglur um framgang strandblaksins séu skýrar og aðgengilegar öllum sem vilja, hlutverk mótshaldara, félaga og íþróttamanna þurfa að vera hafin yfir allan vafa og nafnbótina ,,Íslandsmeistari” þarf að taka alvarlega. Blaksamband Íslands verður að ganga fram fyrir skjöldu og marka stefnuna, setja nauðsynlegar reglur, hafa skýrar boðleiðir gagnvart félögum, íþróttamönnum og mótshöldurum. Hér er verk að vinna og það þarf að takast á við það af festu. Þetta verða íþróttamennirnir, mótshaldarar og önnur innlend íþróttasamtök að virða.

Íslandsmót eru ekki einkamál ,,fárra" útvaldra heldur hluti af stærra samhengi þar sem að hlutverk og forysta Blaksamband Íslands er virt að vettugi. Víða í Evrópu hafa komið upp vandamál vegna einkaaðila sem fara í gang með mót og mótaraðir og hafa af því verulega tekjur. Það er brýnt mál að menn sameinist um að vinna að því að strandblak verði stærri hluti af reglulegri starfssemi Blaksambandsins sem að sameinar hagsmunina sem í húfi eru með framgangi móta og erlendum samskiptum.

Við viljum jú öll sjá íslenska strandblakmenn á erlendum mótum og til þess að svo megi verða þarf að skipuleggja innviðina betur, um það geta flestir verið sammála. Það er ekki ávísun á velgengni ef of margir ætla sér framkvæmdahlutverkið, hlutverk Blaksambandsins er einmitt fólgið í því að samræma alla hagsmunina, skapa ný skilyrði fyrir alla áhugasama einstaklinga og félög á því að taka þátt í spennandi keppnisgrein sem er nánast óplægður akur. Það þekkir bóndinn, enginn verður bútekjan ef menn rækta ekki landið með markvissum hætti.

Til baka

Kristján Geir Guðmundsson | þriðjudagur 25.ágú.09 08:54

Um hvað er verið að tala???

Ég verð að viðurkenna að ég skil ekki þessa grein!!!! Ég veit ekki betur en að stigamótin og Íslandsmótið séu á vegum Blí!!! Og þar af leiðandi ekki einkamál "fárra" útvalda og hvað þá að forysta Blí sé virt að vettugi. Hvaða íþróttamenn, mótshaldarar eða önnur innlend íþróttasamtök hafa ekki virt það??? Og hver er þessi ritstjórn volleyball.is??? Ef að fólk vill gagnrýna gjörðir einhverja eða þá einhverja persónulega, getur það þá ekki gert það undir nafni?

Lilja | þriðjudagur 25.ágú.09 09:48

Mér finnst þetta nú reyndar áhugaverð grein og í raun þörf ábending. Við búum í litlu landi þar sem allir þekkja alla og því miður ekki nærri nógu stór hópur fólks að stunda blak. Því er alltaf hætta á að hagsmunaárekstrum, t.d. sökum tengsla. Mér finnst að allir fjölmiðlar, þ.m.t. volleyball.is, eigi að hafa gagnrýna fjölmiðlun, þ.e. fjalla um allt sem kemur upp á borðið, hvort sem það er slæmt eða gott.

Lilja Jónsdóttir | þriðjudagur 25.ágú.09 11:01

Ég vil taka það fram að það er ekki ég, Lilja, sem skrifa þetta hér að ofan og að ég er sammála Kristjáni.

Kristján Geir Guðmundsson | þriðjudagur 25.ágú.09 12:11

Þörf ábending á hvað??

Lilja einhversdóttir, það má vel vera greinin sé þörf ábending en ábending á hvað??? Það er alveg rétt það sem að þú segir að sökum þess hversu fá við erum sem að byggjum þetta land að þá geti verið erfitt að vinna sum mál. Það sem að fram kemur í greininni hér að ofan hjálpar ekki til með það!!! Þar eru settar fram í hálfkveðnum vísum ýmsar dylgjur sem að ýmist beinast að ónafngreindum félagasamtökum eða persónum. Sem lesanda að þá er manni uppálagt að lesa í milli lína og giska á um hverja er verið að tala og jafnvel um hvað er verið að tala. Slíkt getur nú varla talist til góðrar fjölmiðlunnar og er volleyball.is til minnkunar að mínu viti!!!!!

Lilja Margrét | þriðjudagur 25.ágú.09 13:12

Ég veit því miður ekki hver greinarhöfundur er, en efast um að það sé flókið mál að komast að því þar sem fáir hafa ritréttindi á volleyball.is. Hvað varðar ábendingu, þá er minn skilningur á greininni sá að þegar verið er að halda Íslandsmót, þá þyrfti utanumhaldið að vera formlegra en verið hefur hingað til. T.d. finnst mér a.m.k. að það þyrftu að vera dómarar og hafa mótstjóra sem er ekki sjálfur að keppa á mótinu. Það eru aðilar sem hafa unnið mikið og gott starf til að efla strandblakið á Íslandi og eiga hrós skilið. En ef, eins og greinarhöfundur segir, á að fara að senda lið erlendis þarf mótshald að vera töluvert formlegra og reglur skýrar þannig að ekki sé hægt að bera brigður á úrslit að einu eða neinu leiti.

HT | þriðjudagur 25.ágú.09 16:49

Sammála Lilju Jóns

Ég er alveg sammála Lilju Jóns. hún virðist skilja málin. Ég held að það sé einungis verið að skapa gagnrýna umræðu um srtandblakið og hvetja menn til þess að setja reglur og hafa góða umgjörð um leikinn. Þetta er örugglega ekki gagnrýni á neinn heldur hvatning til þess að gera betur, t.d. ekki gefa leiki o.s.frv.

Lilja Margrét | þriðjudagur 25.ágú.09 17:19

Lilja Jóns sagði nú ekki margt um þetta mál, annað en að hún væri sammála Kristjáni ;-).

forti | þriðjudagur 25.ágú.09 18:00

Góð grein og þarfir punktar

Það er eins og menn séu að búa til storm í vatnsglasi. Er þetta bara ekki eðlileg umræða og mjög heilbrigð. Ég held þetta sé miðlinum ekki til minnkunar enda er eingungis verið að tala um að bæta og skipuleggja mótin betur

Kristján Geir Guðmundsson | þriðjudagur 25.ágú.09 19:22

Umræða um strandblak

Það er sjálfsagt mál að taka umræðuna um hvernig málum er háttað í framkvæmdum á mótunum í strandblakinu en það þarf að gerast af ábyrgð og þekkingu. Greinin hér að ofan er bara svo full af rangindum og mikið talað undir rós að mér hreinlega blöskraði. T.d. að þá eru stigamótin og Íslandsmótið haldin af BLÍ, strandblaksnefnd, ekki af einkaaðilum. Sjálfsagt þarf að bæta reglur og umgjörð í kringum mótin enda ung grein hér á landi en það er bara ekki hlaupið að því að fá fólk í dag til að vinna í kringum þessa hluti og það ókeypis. Klárlega þarf að reyna að koma í veg fyrir það að menn komist í úrslitaleikinn og gefi hann svo, það er greininni ekki til framdráttar!!! Það hefur verið lögð ómæld vinna í það hjá þeim í nefndinni að breiða út strandblakið og mér finnst ómaklega að þeim vegið í greininni. Getur verið að ásetningurinn með henni hafi verið góður og það hafi átt að vekja til umræðu um strandblakið, það tókst en hefði verið hægt að gera með betri hætti og þekkingu með því t.d. að tala við Blí og strandblaksnefndina áður en farið var af stað!!!!

forti | þriðjudagur 25.ágú.09 21:42

Greinin á fullkomnlega rétt á sér og er gott innlegg enda ræðir hún málin mjög almennnt og kannski þá staðreynd að það hefur ekki tekist að fá nægjanlega þátttöku í mótunum. Það eru líka einkaaðilar sem eru að gera út á strandblakið og það eru einmitt varnaðarorð til Blí um að halda fast á spilunum. Ég held að fjölmiðlar eigi einmitt að ræða málin opinskátt og þeir eiga ekki að þurfa að réttlæta skrif sín enda falla þeir um sjálft sig ef þeir standa sig illa. Það er einmitt sagt í greininni að miklar vinsældir séu erlendis og kannski er þess vegna verið að ræða þátttöku fárra. Það er kannski málið að það þarf fleiri til að taka þátt. Það er nú ekki vegið að einum eða neinum í þessari grein og ef menn taka það þannig þá lesa menn þetta eitthvað öðruvísi en ég.

Þórey Haraldsdóttir | miðvikudagur 26.ágú.09 19:43

Að mínu mati er umfjöllun um blak í fjölmiðlum og jafnvel á heimasíðu BLÍ of oft á neikvæðum nótum og það er ekki íþróttinni til framdráttar. En .... hver skrifaði þessa grein? Mér finnst alveg ótrúlegt að einhver skrifi svona gagnrýna grein þar sem vegið er hart að þeim einstaklingum sem mikið hafa á sig lagt til að gera strandblak á Íslandi að veruleika.

Gunna Stina | fimmtudagur 27.ágú.09 13:12

Kemur greinin frá forystu BLÍ????

Ég bara spyr???? Mér brá þegar ég las þessa grein því ég tók henni eins og Kristján og Þórey. Málið er einfalt...það væri ekkert strandblak á Íslandi nema af því að fáir "útvaldir" ákváðu að það skyldi verða strandblak á Íslandi. Og þessir fáu "útvöldu" hafa lagt ótrúlega mikið á sig til þess að breiða út íþróttina hér á landi og þó svo að þeir keppi líka á þessum mótum og það séu ekki löglegir dómarar osfrv. fyrstu árin þá finnst mér það ekki setja íþróttina neitt niður. Við eigum ekki strandblaksdómara, því það er ekki sama dómgæsla í strandblaki eins og í inniblakinu - talsvert flóknara. Og mér finnst bara alls ekkert fá lið vera að taka þátt... Góðir hlutir gerast hægt en persónulega finnst mér að þeir hafi gerst ótrúlega hratt í strandblakinu samanborið við inniblakið sem við þó stundum æði mörg allan veturinn. Hvað er oft sjónvarpað af þeim viðburðum okkar????? Þeir "útvöldu" hafa þó fengið sjónvarpið nokkrum sinnum í sumar og nánast einhver umfjöllun um hvert mót sem haldið hefur verið í sandinum sem ekki er hægt að segja um inniblakið. Og gleymum því ekki að þetta er allri blakíþróttinni til góða þessi umfjöllun og ekki veitir af því íþróttin okkar hefur ekki fengið mikla umfjöllun s.l. ár í fjölmiðlum. Við skulum öll einbeita okkur að því að skapa blakíþróttinni þann sess í fjölmiðlum sem hún á heima - umfjöllun um leiki og mót, og úrslit úr leikjum. Þannig náum við yngri kynslóðinni inn...og við þurfum þess svo sannarlega....líka í strandblakið....

Helgi | fimmtudagur 27.ágú.09 21:59

Það virðist sem að eitthvað sannleikskorn sé fólgið í greininni miðað við ummælin. Ég velti því fyrir hverjir þessir útvöldu einstaklingar eru sem vegið er svona hart að eins og Þórey segir? Ég sé ekki minnst á neitt einasta nafn en ummælin benda til þess að menn taki þau til sín og ef svo er þá er eitthvað sannleikskorn í þeim? Annars skil ég ekki kommentin frá Gunnu Stínu sem eru mótsagnakennd þar sem að hún segir að hún hafi tekið greininni eins og sumir aðrir, síðan er haldið áfram og rætt um þessa fáu útvöldu. Eru menn ekki að skjóta sig í fótinn með því að andmæla í einu orðinu en staðfesta síðan það sem segir í greininni? Annars held ég að það sé besta mál að menn tjái sínar skoðanir það hlýtur að skapa umræðu um málin, eða má bara ræða það sem fólki er þóknanlegt?