Fréttir af ársþingi BLÍ
mánudagur 07.júní 2010 - Ritstjórn Volleyball.is - Lestrar 88 - Athugasemdir (0)
38. ársþing BLÍ fór fram laugardaginn 5. júní. Volleyball.is greinir frá því helsta sem fram fór.
Sama dag og ársþingið fór fram voru bæði karla- og kvennalandsliðið við æfingar og strandblaksnefndin stóð fyrir
námskeiði í strandblaki. Það var því af nógu að taka þennan daginn og fréttaskrifarar volleyball.is þurftu að koma við
á nokkrum stöðum.
28 þingfulltrúar mættu á þingið sem telst í meðallagi. Ekki lágu mörg mál fyrir þinginu og var reiknað með frekar
stuttu þingi af þeim sökum. Það varð þó ekki raunin. 2 tillögur bárust með skömmum fyrirvara og samþykkti þingið
að taka þær á dagskrá. Þetta er alls ekki óþekkt á þingum BLÍ en hefur oft valdið ákveðnum vandræðum
þar sem þingfulltrúar hafa ekki haft ráðrúm til að kynna sér tillögurnar til hlítar. Það er umhugsunarefni fyrir forsvarsmenn
hreyfingarinnar hvort ekki sé rétt að herða tökin á þessu í þeim tilgangi að gera ársþingið markvissara.
Breytingar urðu á stjórn BLÍ en þeir Stefán Jóhannesson og Davíð Búi Halldórsson luku sínu 2 ára
tímabili. Venju samkvæmt þurfti því að kjósa 2 stjórnarmenn. Davíð Búi gaf ekki kost á sér áfram en
það gerði Stefán hinsvegar. Auk Stefáns buðu sig fram Kristján Geir Guðmundsson og Lilja Margrét Hreiðarsdóttir. Kosningu hlutu þeir
Stefán og Kristján Geir. Þeir taka því sæti í stjórn BLÍ næstu 2 árin. Varastjórn BLÍ var einnig kjörin en
hún er óbreytt frá fyrra ári, skipuð þeim Hreggviði Nordahl, Valdimari Hafsteinssyni og Óskari Haukssyni.
