Öruggur sigur á Möltu - komnir inn í lokakeppnina
laugardagur 19.júní 2010 - Ritstjórn Volleyball.is - Lestrar 116 - Athugasemdir (0)
Íslenska karlalandsliðið fylgdi vel eftir góðum sigri á San Marino í gær. Liðið vann í dag öruggan sigur á gestgjöfunum
frá Möltu 3 - 0 (25-17,25-16,25-22).
Með sigrinum er öruggt að Ísland lendir í öðru af tveimur efstu sætum riðilsins og fer þar með í úrslitakeppnina sem fram
fer í Andorra á næsta ári. Þetta er frábær árangur hjá strákunum, ekki síst í ljósi þess að
liðið mætti töluverðu mótlæti við undirbúninginn.
Að sögn landsliðsþjálfarans, Michael Overhage, var aldrei spurning hvoru megin sigurinn lenti í dag. Ísland var betra liðið á öllum
sviðum. "Við réðum leiknum frá fyrsta stigi til hins síðasta. Góð móttaka, og frábær hávörn lagði grunninn að
góðum sigri. þá var Valur Guðjón Valsson, uppspilari liðsins öflugur í dag og dreifði spilinu eins og herforingi. Það er
ánægjulegt, ekki síst í ljósi þess að hann náði einungis að æfa með liðinu í viku fyrir keppnina". Íslenska
liðið gat leyft sér að skipta varamönnum inná í leiknum og hafa nú flestir leikmenn komið við sögu á mótinu.
Á morgun mætir liðið svo Luxembourg í hreinum úrslitaleik en Luxembourg hefur unnið báða sína leiki líkt og
Ísland.
