Volleyball.is

Blakdeild Fylkis mun fá fleiri tíma til umráða næsta vetur og því er stefnan tekin á að stækka og efla deildina. Félagið hyggst senda lið í efstu deild karla á nýjan leik eftir stutt hlé en áfram verður þó karlalið í 2. deild.  Þetta er verulega góðar fréttir fyrir blakíþróttina en BLÍ hefur lengi unnið að því að stækka 1. deild karla. Þá verða Fylkisstúlkur áfram í efstu deild en auk þess er Fylkir með lið í 2. og 3. deild kvenna. Að sögn Ástríðar Valbjörnsdóttur, stjórnarmanns í blakdeildinni, er nú verið að leita að þjálfurum fyrir marga flokka. Hún vill einnig benda á að leikmenn sem hafa áhuga á að ganga til liðs við félagið eru velkomnir í hópinn. Með svo mikið framboð af liðum ættu allir að geta fundið eitthvað við sitt hæfi.

Megintíðindin eru kannski þau að setja á aukinn kraft í barna og unglingastarfið hjá félaginu. Ekki er vanþörf á því að Reykjavíkurfélögin taki við sér þar og vonandi að fleiri félög líti nú til þess sem blakdeild Fylkis er að gera.